Nënshkruhet kontrata mbi deponinë mes Arifit dhe "Saba Bellçës"
Kryetari i Komunës së Bujanocit Nagip Arifi dhe përfaqësuesit të kompanisë “Saba Bellça” nga Presheva, sot kanë nënshkruar kontratën me vlerë rreth 60 milion dinarë (pa tvsh) për ndërtimin e transfer stacionit për grumbullimin e mbeturinave në këtë komunë.
Me nënshkrimin e kësaj kontrate është paraparë ngritja e ndërtesës për grumbullimin e mbeturinave.
“Ky projekt është shumë me rëndësi për komunën tonë, pasi po bëjmë ndërtesë dhe pajisje për riciklimin e mbeturinave”, ka thënë kryetari Arifi, duke theksuar se nëse vitin e ardhshëm sigurojnë mjete do të furnizohen edhe me pajisjet për riciklimin e mbeturinave.
Nga ana tjetër përfaqësuesi i kompanisë “Saba Bellça” nga Presheva Driton Etemi shprehet i gatshëm për ndërtimin e këtij stacioni grumbullues i cili duhet të përfundohet në një afat prej 120 ditëve.
“Ne si kompani e përzgjedhur për ndërtimin e tranfer stacionit jemi të gatshëm për të kryer këtë projekt në afat që e kemi të caktuar. Ky projekt është mjaft i qëlluar, që ka korr sukses nëpër komunat tjera të ndërtuara në Evropë, ndërsa komuna e Bujanocit është e para që po e realizon këtë projekt të qëllum”, është shprehur Etemi, transmeton televizioni publik.
Objekti i transfer stacionit do të ngritet në deponinë e tanishme të Bujanocit. Hartimi i projekt dokumentacionit të objektit është bërë vitin e kaluar nga BE, përmes programi EU Progres.
Në këtë fazë të parë të punimeve merr pjesë edhe Trupi Koordinues për Preshevë, Bujanoc e Medvegjë, që ka ndarë rreth 20 milion dinarë. /Titulli.com/
